URGANCH — Bugun Urganch shahridagi “Guliston” avtomaktabida tahsil olayotgan talaba-yoshlar ishtirokida transport va yoʻl xoʻjaligi sohasi masʼullari bilan ochiq muloqot tarzida uchrashuv tashkil etildi. Unda viloyat transport tizimi hamda sohaga oid nazorat inspeksiyalarining rahbar va mutaxassislari qatnashdilar.
Uchrashuvdan koʻzlangan asosiy maqsad — boʻlajak haydovchilarni transport va yoʻl harakati xavfsizligi sohasida amalga oshirilayotgan islohotlar bilan tanishtirish, ularning huquqiy savodxonligini oshirish hamda masʼul idoralar faoliyati haqida batafsil maʼlumot berishdan iborat boʻldi.
Tadbir davomida soʻzga chiqqan har bir masʼul xodim oʻz yoʻnalishi boʻyicha amalga oshirilayotgan ishlar va yoshlar bilishi lozim boʻlgan muhim jihatlarga toʻxtalib oʻtdi:
- B. Zaripov (Xorazm viloyati transport boshqarmasi "Xorazm yoʻlovchi tashishni monitoring va nazorat qilish" davlat muassasasi direktori oʻrinbosari): Yoshlarga viloyat hududida jamoat transporti yoʻnalishlarini muvofiqlashtirish, yoʻlovchi tashish xizmatlari sifatini oshirish hamda raqamli monitoring tizimining ishlash mexanizmlari haqida soʻzlab berdi.
- F. Qoʻchqarov (Transport nazorati inspeksiyasi Avtomobil transportida nazorat Xorazm viloyati hududiy boʻlimi boshligʻi oʻrinbosari): Avtomobil transportida yuk va yoʻlovchi tashish qoidalari, litsenziya talablari hamda yoʻllarda noqonuniy tashuvlarga qarshi kurashish borasidagi nazorat tadbirlari mazmun-mohiyatini tushuntirdi.
- D. Roʻzmetov (Transport nazorati inspeksiyasi Suv transportida nazorat Xorazm viloyati hududiy boʻlimi bosh inspektori): Viloyatdagi mavjud suv havzalarida kemalardan xavfsiz foydalanish, suv transporti vositalarini roʻyxatdan oʻtkazish hamda suvda baxtsiz hodisalarning oldini olish qoidalariga toʻxtaldi.
- S. Ismoilov (Yoʻl qurilish ishlarini nazorat qilish Xorazm viloyati hududiy boʻlimi boshligʻi): Viloyatdagi yoʻl infratuzilmasini yaxshilash, zamonaviy va xavfsiz yoʻllar qurilishi jarayonida sifat nazoratini taʼminlash borasida koʻrilayotgan choralar haqida maʼlumot berdi.
 |  |
Ochiq muloqot shaklida oʻtgan uchrashuvda talaba-yoshlar oʻzlarini qiziqtirgan savollar, xususan, yoʻl harakati xavfsizligini taʼminlash, jamoat transporti qatnovini yaxshilash va yoʻl belgilari oʻrnatilishi yuzasidan oʻz fikr hamda takliflarini bildirdilar. Yoshlar tomonidan oʻrtaga tashlangan barcha savollarga soha mutaxassislari tomonidan atroflicha va asosli javoblar qaytarildi.
Tadbir yakunida boʻlajak haydovchilarga yoʻllarda hamisha hushyor va masʼuliyatli boʻlish, qoidalarga qatʼiy amal qilish lozimligi yana bir bor eslatib oʻtildi.
Xorazm viloyati transport boshqarmasi Axborot xizmati
