Ijtimoiy tarmoqlarda tarqalgan “Xorazm viloyati transport boshqarmasi xodimlari 6 oydan buyon oylik olmayotganligi to‘g‘risida murojaat yo‘llandi” nomli murojaat yuzasidan rasmiy munosabat.
O‘zbekiston Respublikasi Prezidentining 2023-yil 16-fevraldagi “Jamoat transporti tizimini isloh qilish chora-tadbirlari to‘g‘risida”gi PQ-59-sonli qarori qabul qilingan.
Qaror bilan, Xorazm viloyati transport boshqarmasida brutto-shartnomaga o‘tgan tashuvchilar tomonidan yo‘nalish ko‘rsatkichlari bajarilishini monitoring qiluvchi va baholovchi tizimni joriy etish maqsadida, avtomatlashtirilgan dispetcherlik xizmatini o‘z ichiga oluvchi “Xorazm Yo‘lovchi tashishni monitoring va nazorat qilish” davlat muassasasini tashkil qilingan.
Shuningdek, O‘zbekiston Respublikasi Prezidentining 2024-yil 25-martdagi “Jamoat transportini moliyalashtirish tizimini takomillashtirish bo‘yicha qo‘shimcha chora-tadbirlar to‘g‘risida”gi PQ-139-sonli qarori bilan mazkur davlat muassasasining funksiya va vazifalariga o‘zgartirishlar kiritilgan hamda joriy yilning 01 may sanasidan “Xorazm Yo‘lovchi tashishni monitoring va nazorat qilish” davlat muassasasining tashkiliy tuzilmasi qayta tasdiqlandi.
Bugungi kunda, tasdiqlangan shtat jadvaliga asosan “Xorazm Yo‘lovchi tashishni monitoring va nazorat qilish” davlat muassasasi xodimlarining oylik maoshlarini to‘lab berish maqsadida Transport vazirligi, Moliya vazirligi hamda viloyat moliya boshqarmasi bilan amaliy ishlar olib borilib barcha hisob-kitoblar Moliya vazirligiga taqdim qilingan.
Joriy yilning Iyun oyi yakuniga qadar barcha xodimlarga yanvar-may oylaridan bo‘lgan oylik maoshidan qarzdorligi hamda iyun oyi oylik maoshi bo‘yicha hisob-kitoblar amalga oshirilishini ma’lum qilamiz.
Xorazm viloyati transport boshqarmasi